पुण्यातील दांडेकर पूल भागामध्ये 1 मे आंतरराष्ट्रीय कामगार दिनानिमित्त पत्रक वाटून भाषण देत अभियान करण्यात आले.

कामगार दिनाचा इतिहास, आजची कामगार वर्गाची परिस्थिती, भगतसिंहाचे अपूर्ण स्वप्न, मागच्या एक वर्षापासून कोरोनामुळे आणि सत्ताधाऱ्यांच्या कामगार वर्गविरोधी धोरणांमुळे कामगार-कष्टकरी वर्ग सहन करत असलेल्या हालअपेष्टा यांवर भाष्य करण्यात आले. कोरोना संकटाचा सर्वाधिक मार पडला आहे तो कामगार-कष्टकरी वर्गावर. अगोदर अनियोजित, अमानवी लॉकडाऊनमध्ये मोदी सरकारने काहीही मदत न करता कंबरडे मोडले, बेरोजगार केले, उपासमार घडवली, कोट्यवधी कामगारांना शेकडो-हजारो किलोमीटर पायी चालवले. वर्षभर भांडवलदारांच्या नफ्याच्या चिंतेत गुंतलेल्या राज्य-केंद्र सरकारांनी आता दुसऱ्या लाटेसाठी ऑक्सिजन, औषधे, बेड, आयसीयू, लशीचे कारखाने वाढवलेच नाहीत. परिणामी आता काळ्याबाजारात लाखो-कोटी खर्चून सुद्धा इलाज दुर्लभ आहे. सर्वांना मोफत आणि दर्जेदार आरोग्य सेवा मिळणे हे कामगार-कष्टकरी वर्गाचे येत्या काळातील लक्ष्य असले पाहिजे. कामगार दिवसाच्या दैदिप्यमान इतिहासाचा वारसा पूढे चालू ठेवण्यासाठी आज सर्वात जास्त गरज असलेल्या आरोग्यसेवेचे राष्ट्रीयीकरण करण्याच्या मागणीसाठी संघटित होण्याचे आवाहन यावेळी नौभासच्या कार्यकर्त्यांनी केले.