भगतसिंह जनअधिकार यात्रेच्या दुसऱ्या टप्प्याच्या शेवटी आयोजित आंदोलनाला थांबवण्याच्या प्रयत्नात दिल्ली पोलिसांनी त्याला आणखी यशस्वी बनवले.

काल ३ मार्च ला जंतर-मंतर, नवी दिल्ली येथे गेल्या तीन महिन्यांपासून चालु असलेल्या भगतसिंह जनअधिकार यात्रेच्या दुसऱ्या टप्प्याचा शेवट होणार होता. ही यात्रा 10 डिसेंबर 2023 पासून सुरू होती आणि 13 राज्य, 85 जिल्हे आणि 8500 किलोमिटर चा प्रवास पार करून 26 फेब्रुवारी 2024 ला दिल्लीत पोहोचली होती आणि तेव्हापासून दिल्लीतल्या वेगवेगळ्या भागात चालु होती. यात्रेचा भाग म्हणून बवाना इण्डस्ट्रियल एरिया, ट्रॉनिका सिटी इण्डस्ट्रियल एरिया, करावलनगर, खजूरी इत्यादी भागातील कामगारांनी संप पुकारला होता. तसेच 12 राज्यांमधून कामगार, स्त्रिया, विद्यार्थी तरुण आज दिल्लीला पोहोचले होते. सकाळी 11 वाजता कामगार, स्त्रिया, विद्यार्थी तरुण मोठ्या संखेने जंतर मंतर मैदानात जमू लागले होते. पोलिसांनी तेथे कलम 144 लागू असल्याचा बहाणा करून हजारोंच्या संख्येने उपस्थित आंदोलनकर्त्यांवर बळाचा वापर करत शेकडो लोकांना वीसएक बसांमध्ये कोंबून दिल्लीच्या वेगवेगळ्या पोलीस ठाण्यात घेऊन गेले. परंतु हे एक प्रदर्शन आणखी दहा प्रदर्शनांना जन्म देत आहे याची पोलिसांना कल्पना नव्हती. ज्या ज्या पोलिस ठाण्यांमध्ये आंदोलकांना नेण्यात आले त्या त्या ठिकाणी निदर्शने सुरू झाली. मंदिर मार्ग पोलिस ठाण्यासह अनेक पोलिस ठाण्यांचे पोलिस वैतागले आणि त्यांनी खासगी बसेस बोलावून आंदोलकांना त्यात भरून दिल्लीच्या दूरवरच्या भागात सोडण्यास सुरुवात केली. पण त्याच दरम्यान सुमारे 1000 लोकांचा दुसरा जमाव बॅरिकेड्स हटवून जंतरमंतरवर पोहोचला आणि तिथे सभा सुरू झाली. परिणामी, पोलिसांनी त्यांना पुन्हा ताब्यात घेतले आणि नजफगढ, द्वारका, विमानतळाजवळील भाग, दिल्ली कँट इत्यादी दिल्लीच्या दूरवरच्या पोलीस ठाण्यांमध्ये घेऊन गेले. पोलिस ठाण्यांमध्ये पुन्हा निदर्शने सुरू झाली. सायंकाळपर्यंत पोलीस वैतागले आणि त्यांना पुन्हा आंदोलनकर्त्यांना सोडावे लागले. दरम्यान, बवाना औद्योगिक परिसरात पोलिसांनी संप करणाऱ्या कामगारांवर लाठीमार केला आणि बवाना औद्योगिक क्षेत्र मजदूर युनियनचे संयोजक भरत यांच्यासह अनेक राजकीय कार्यकर्त्यांना अटक केली. ते अजूनही पोलिसांच्या ताब्यात आहेत. मात्र बवाना औद्योगिक क्षेत्रातील बहुतांश कारखाने बंद राहिले आणि संप यशस्वी झाला.