खूनी वेदांता, खूनी विकास! तुतिकोरिन (तुतुकुडी) येथील गोळीबाराची घटना आपल्या मानवीय अस्तित्वाला आव्हान आहे!
22 मे रोजी तामिळनाडू मधील तुतिकोरीन येथे वेदांता ग्रुपची कंपनी असलेल्या स्टरलाईट कॉपर कंपनीच्या विरोधात आंदोलन करणाऱ्या 13 लोकांची गोळ्या घालून हत्या करण्यात आली. या प्रकल्पाला लोकांनी विरोध करण्याचे मुख्य कारण होते या प्रकल्पातून निघणाऱ्या सल्फर डायऑक्साईड वायूमुळे निर्माण झालेली आरोग्याची भयंकर समस्या. याला सन 2013 पासून लोकांचा विरोध होत होता. विरोध करणाऱ्या लोकांवर निशाणेबाज (स्नायपर्स) वापरून गोळ्या घालण्यात आल्या. वेदांता कंपनीची दलाली करण्यात भारत आणि तामिळनाडू सरकारने अशाप्रकारे कोणतीही कसर सोडलेली नाही.
वेदांता ही लंडन मध्ये स्थित असलेली बहुराष्ट्रीय कंपनी आहे आणि प्रदूषण करण्यासाठी जगभरात कुख्यात आहे. या कंपनी विरोधात हवा, पाणी आणि आसपासचे वातावरण प्रदूषित करण्याविरोधात झांबिया देशातील 2000 गावांनी सुध्दा केस ठोकली आहे. गोळीबारात मेलेले आणि प्रदूषणाने मेलेले सर्व लोक भारतीयच होते, पण त्यांच्यासाठी आता भाजपाई आणि संघी लोकांना भारतमाता आठवणार नाही कारण वेदांताची ‘देणगी’ यांच्यापर्यंत पोहोचलेली आहे. खरंतर भाजप आणि कॉंग्रेस या दोन्ही पक्षांना वेदांताने अधिकृतरित्या कोट्यवधी रुपयांची देणगी अगोदरच दिलेली आहे. वास्तव हे आहे की भांडवली लुटेरू कंपन्या आपला नफा वाढवण्यासाठी कोणत्याही हद्दीला जाऊ शकतात. स्पर्धेत टिकण्यासाठी, आपली गुंतवणुक कमी करून नफा कमावण्यासाठी एका बाजूला कंपन्या मजूरांच्या श्रमाचे शोषण करतात, आणि दुसरीकडे सर्व कायद्यांना धाब्यावर बसवून कचरा, गॅस, इत्यादींना खुलेआम नद्या, उलटे-बोरिंग द्वारे जमिनीच्या आत, हवेत सोडतात. यामुळेच आपल्या नद्या, पाण्याचे स्त्रोत, जंगलं, जीव-जंतू, शेती, हवा, इत्यादी सगळे प्रचंड प्रदूषणाचे शिकार होत आहेत. कॅंसर, टीबी, दम्यासारखे अनेक आजार महामारीप्रमाणे पसरत आहेत. निसर्गाच्या विनाशाचा अपराध अत्यंत भयानक अपराध आहे. या अपराधामध्ये जगभरातील भांडवलदार, निवडणूकबाज पक्ष, आणि सगळी भांडवली मशिनरी सामील आहे.
या हत्येमध्ये दिसलेले पोलिसांचे तांडव आजच्या व्यवस्थेचे नरभक्षी आणि फॅसिस्ट चरित्र ठळकपणे दाखवते. ही घटना दाखवते की तथाकथित विकासाचे हे ढोंग मुळात माणसांचे मृतदेह आणि निसर्गाच्या बरबादीवर टिकलेल्या नफ्याच्या हावेला पुरे करण्यासाठी केले जात आहे. भांडवली दानवी व्यवस्था नफ्याच्या हावेपोटी इतकी वेडी झाली आहे की कष्टकऱ्यांचे जीवन आणि संपूर्ण पृथ्वीच गिळून घ्यायला निघाली आहे. आपले सरकार स्वतंत्र असते आणि जनतेचे प्रतिनिधित्व करते या भ्रमात अनेक लोक जगतात. वास्तव हे आहे की मोठमोठे भांडवलदार सरकारांना खिशात घेऊन फिरतात. तुतिकोरिन सारख्या घटना दाखवतात की भांडवली लोकशाही मध्ये सरकारी मशिनरी भांडवलदारांपासून स्वत:ला जितके वेगळे दाखवण्याचे नाटक करत होती, तितके सुद्धा आता शक्य नाही. आज शासन, सरकारी यंत्रणा, न्यायव्यवस्था, मीडीया हे सर्व निर्लज्जपणे भांडवलदारांच्या सोबत उभे आहेत. वास्तवात पाहिले तर सर्व जगामध्ये भांडवली लूटीतून निर्माण झालेल्या आर्थिक संकटाने सर्व जगालाच आपल्या जबड्यात पकडले आहे. यातून बाहेर निघण्याचा त्यांच्याकडे कोणताही मार्ग नाही. आपला नफ्याचा दर कायम ठेवण्यासाठी ते मनुष्य आणि प्रकृतीच्या रक्षणासाठी बनलेल्या प्रदूषणाच्या मर्यादित कायद्यांनाही मानण्यास तयार नाहीत. मूठभर भांडवलदारांना फायदा पोहोचवण्यासाठी सरकार एका बाजूला ‘श्रम सुधार’ सारख्या भ्रामक शब्दांचे खेळ करत श्रम कायदेच संपवत आहेत आणि दुसरीकडे आपले दमनतंत्र मजबूत करत आहे. स्टरलाईटच्या बाबतीत तर भांडवलदार आणि सत्ताधाऱ्यांची मिलीभगत इतकी तगडी आहे की विरोध होऊन एकदा प्रकल्प बंद होऊनही नंतर कॉंग्रेस आणि भाजपला पैसे खाऊ घालून कंपनीने प्रकल्प पुन्हा चालू करवला. भारतातील तथाकथित डाव्या संघटनांना कमीत कमी या घटनेनंतर भाजप विरोधाच्या नावावर कॉंग्रेसच्या शेपटाला भांग पाडणे किंवा मानवविरोधी विकासाच्या फॅसिस्ट रथाला थांबवण्यासाठी लालू-मुलायम मध्ये शक्यता शोधणे बंद केले पाहिजे. वास्तव हेच आहे की उदारीकरण-खाजगीकरणाच्या धोरणांवर या सर्वांमध्ये सर्वसाधारण सहमती आहे.
भारतात व्हॉट्सएप, फेसबुक वरून ज्ञान प्राप्त करणारा मध्यमवर्गाचा एक हिस्सा मोदींच्या ‘विकासाचे’ गाणे गात आहे. खरेतर या विकासाची सगळी मलाई मोठमोठे भांडवलदार, नेते, ठेकेदार, अधिकारीच खातील आणि या मध्यमवर्गाला त्यांचं उष्टं सुद्धा मिळणार नाहीये. या फॅसिस्टांच्या विकासामध्ये बेरोजगारी वाढते, सुरक्षेच्या उपकरणांविना कष्टकरी प्रत्येक दिवशी मरतात, आपले पोट भरण्यासाठी कष्टकऱ्यांना 12 ते 14 तास जनावरांसारखे राबावे लागते, पॄथ्वीचा विनाश केला जातो, ज्यामध्ये महागाई-भूकबळी वाढतात, ज्यामध्ये शिक्षण, आरोग्यासारख्या सुविधांनाही विकाऊ माल बनवले जाते, ज्यामध्ये कर्मचाऱ्यांच्या सुविधा हिसकावून घेतल्या जातात, ज्यामध्ये वरचे 10 टक्के लोक 80 टक्के संपत्तीवर कब्जा करतात, ज्यामध्ये लोकशाहीच्या नावाने गाजावाजा केला जातो आणि तुतिकोरीन मध्ये केल्याप्रमाणे हक्क मागणाऱ्या लोकांच्या तोंडात बंदुकीची नळी घालून मारले जाते. मित्रहो, हा विकास नाही, भांडवलदारांद्वारे धरतीवर मानव जीवनाचा विनाश आहे. जर या भांडवली व्यवस्थेला इतिहासाच्या दफनभूमीत गाडण्यासाठी नाही उतरलो, तर आपणही या अपराधाला भागीदार असू.
नौजवान भारत सभा
दिशा विद्यार्थी संघटना
